Mu mukino wahuje Musanze FC na Kiyovu Sports, Musanze yatsinze ibitego 3-0, bituma ikomeza kwerekana imbaraga mu mikino ya shampiyona.
Ariko se, ibyabereye imbere n’inyuma y’uyu mukino birerekana iki ku isura y’umupira w’amaguru mu Rwanda?
Mu mashusho yasakaye ku mbuga nkoranyambaga, bivugwa ko mbere y’uyu mukino, umutoza wungirije wa Muhazi United yahamagaye myugariro Shafik Bakaki wa Musanze FC amusaba ko yafasha Kiyovu Sports gutsinda Musanze FC.
Nubwo ibi bitigeze bigira ingaruka ku mukino wabaye, benshi bibajije niba koko hari abatoza cyangwa abakinnyi baba bagira uruhare mu gucura imigambi yo gutsindwa nkana.
Mugiraneza Jean Baptiste uzwi ku izina rya Miggy, wahoze akinira Ikipe y’Igihugu Amavubi, aravugwaho kugira uruhare mu bikorwa bigamije gutsindisha Musanze FC.
Biravugwa ko Miggy ashaka kubona iyi kipe itsindwa kugira ngo Imurora Japhet uzwi nka “Drogba” yirukanwe, kuko ngo amushinja kuba yaragize uruhare mu kwirukanwa kwe.
Miggy ari mu bakinnyi beza bakina hagati u Rwanda rwagize. Mu 2020, yatangaje ko asezeye gukinira Ikipe y’Igihugu Amavubi, ariko akomeza gukina mu makipe asanzwe kugeza muri Kamena 2023, ubwo yasezeraga ku mupira nk’uwabigize umwuga.
Yakiniye amakipe atandukanye nka La Jeunesse, Kiyovu Sports, APR FC, Gor Mahia, Azam FC, KMC na Police FC.
Ibi bibazo byagaragaye mbere y’umukino wa Musanze FC na Kiyovu Sports birerekana ko hari byinshi bigomba gukosorwa mu mupira w’amaguru nyarwanda.
Gushaka gutsindisha ikipe nkana, imigambi yo kwirukanisha abatoza, ndetse n’ingaruka byagira ku iterambere ry’umukino, ni ibintu bikwiye kwitabwaho n’inzego zibishinzwe.
Ese FERWAFA izagira icyo ikora ku byagaragajwe muri uyu mukino? Ese Miggy yaba afite indi migambi afitiye Musanze FC? Ibi ni bimwe mu bibazo bikomeje kwibazwa n’abakunzi b’umupira w’amaguru mu Rwanda.
Tubibutse ko mushobora gukurikirana iki gitangazamakuru ku zindi mbuga nkoranyambaga zacyo zemewe, mukazajya mugezwaho amakuru agezweho ako kanya.
Kanda hano udukurikirane (Follow) kuri Facebook Page yacu. Cyangwa ukande hano udukurikirane kuri X
