Mu rukerera rwo kuri uyu wa Gatandatu, inkuru y’ubwicanyi bwakorewe mu Mudugudu wa Masaka mu Karere ka Kicukiro yashegeshe benshi.
Umukozi wo mu rugo witwa Niyonita Eric yishe mugenzi we, Bampire Françoise, amuteye icyuma, maze inzego z’umutekano zitabaye, na we araswa ubwo yashakaga kugirira nabi abari bamwegereye.
Uyu mwicanyi, wari usanzwe ukora mu rugo kimwe na nyakwigendera, yateje ubwoba ubwo nyuma yo kwica mugenzi we yatangiye gushaka gutema abandi, bituma Polisi ihitamo kumurasa kugira ngo ihoshe ibyari bigiye guhinduka ibyago bikomeye.
Nk’uko bitangazwa n’Umuvugizi wa Polisi mu Mujyi wa Kigali, CIP Wellars Gahonzire, inzego z’umutekano zahageze zije gutabara ariko zisanga Niyonita Eric afite icyuma, yiteguye gutema buri wese wari hafi aho.
Polisi yagize icyo ikora kugira ngo ihagarike ibikorwa bye, birangira imurashe.
CIP Gahonzire yagize ati: “Yashakaga gutema buri wese umwegereye, byabaye ngombwa ko afatwa hakoreshejwe ingufu.”
Yongeyeho ko amakuru arambuye ku byabaye aza gutangazwa nyuma y’iperereza rirambuye ku mpamvu nyamukuru yatumye uyu musore yica mugenzi we ndetse akagerageza no kugirira nabi abandi.
Nubwo hataramenyekana neza impamvu yateye Niyonita Eric kwica mugenzi we Bampire Françoise, hari amakuru avuga ko bombi bari basanzwe bakorana mu rugo rumwe.
Nta makimbirane azwi bari bafitanye mu buryo bweruye, ari na yo mpamvu ubu bwicanyi bwatunguranye ku miryango yabo ndetse no ku batuye aka gace.
Bamwe mu batuye Masaka bavuga ko bumvise induru nyinshi nijoro, bikaba byamenyekanye nyuma ko ari amahane yari hagati y’aba bakozi bombi.
Umwe mu baturanyi yagize ati: “Twabyutse twumva urusaku, dusohotse dusanga umukobwa aryamye hasi ari gutakamba, ariko nyuma y’igihe gito yahise apfa.”
Hari kandi n’abavuga ko Niyonita Eric ashobora kuba yari afite ibibazo byihariye byatumye akora icyo gikorwa cy’ubugome, gusa iperereza rya Polisi rizatanga ibisobanuro birambuye ku cyateye ubu bwicanyi.
Abaturage bo mu gace byabereyemo batewe ubwoba n’icyo gikorwa kidasanzwe, bakavuga ko basanzwe babana mu mutuzo.
Umwe mu baganiriye n’itangazamakuru yagize ati: “Ntitwigeze twumva aba bakozi bafitanye ikibazo gikomeye, ibi biradutunguye cyane.”
Gusa, bagize ihumure nyuma y’uko inzego z’umutekano zihagobotse, zikabakiza uwo mugizi wa nabi mbere y’uko akomeza kugirira nabi abandi.
Polisi yatangaje ko iperereza rikomeje kugira ngo hamenyekane neza icyateye uyu musore kwica mugenzi we.
Byitezwe ko amakuru yisumbuyeho azatangazwa mu masaha ari imbere.
Mu gihe hagitegerejwe ibisobanuro birambuye, iyi nkuru yasize inkuru mbi ku miryango y’ababuze ababo ndetse n’abaturage bose b’i Masaka.
Abayobozi b’aka gace basabye abaturage kuba maso no gutanga amakuru ku gihe igihe cyose babonye ibimenyetso by’amakimbirane ashobora kuvamo ibikorwa bibi nk’ibi.
Inkuru iracyakurikiranwa…
Tubibutse ko mushobora gukurikirana iki gitangazamakuru ku zindi mbuga nkoranyambaga zacyo zemewe, mukazajya mugezwaho amakuru agezweho ako kanya.
Kanda hano udukurikirane (Follow) kuri Facebook Page yacu. Cyangwa ukande hano udukurikirane kuri X
