Minisiteri y’Ubuzima yatangaje ko kuri uyu wa Gatandatu tariki ya 29 Gicurasi 2021, u Rwanda rutangira gutanga doze ya kabiri y’urukingo rw’icyorezo cya COVID-19 ku bakingijwe ubwoko bw’Astra-Zeneca hakaba harimo kwifashishwa indege za Kajugujugu mu gukwiza izo nkingo mu gihugu hose.
Iyo gahunda isubukuwe nyuma y’igikorwa cyo gukingira COVID-19 cyabereye mu gihugu hose kigasiga abagera ku 350,400 babonye inkingo, hakaba hagamijwe cyane cyane gutanga urukingo rushimangira ku bari bahawe urukingo rwa OXFORD-AstraZeneca.
Abakingirwa ni icyiciro cy’abahawe urukingo rw’Astra Zeneca bagombaga gutegereza hagati y’ibyumweru 8 na 12 nyuma yo guhabwa urukingo rwa mbere nk’uko byateganyijwe n’impuguke zakoze izo nkingo.
Iki cyiciro kije gikurikira icy’abahawe urukingo rwa Pfizer batangiye guhabwa doze ya kabiri guhera tariki ya 2 Mata 2021 mu rwego rwo gukomeza gahunda yo gukingira icyorezo cya COVID-19 hakoreshejwe izo nkingo ebyiri zemejwe n’Ishami ry’Umuryango w’Abibumbye ryita ku Buzima (OMS).
Urukingo rwo gushimangira rugiye gutangwa nyuma y’aho u Rwanda rwakiriye izindi doze za AstraZeneca zigera ku 247,000 binyuze mu bufatanye bw’ibihugu bugamije gukwirakwiza inkingo za COVID-19 ku Isi, (COVAX), izo doze kandi zikaba zirimo izigera ku 117,600 zabonetse ku bufatanye na Guverinoma y’igihugu cy’u Bufaransa.
Minisitiri w’Ubuzima Dr Daniel Ngamije, yagize ati: “Twishimiye cyane ubufatanye na Guverinoma y’igihugu cy’u Bufaransa ndetse n’abandi bafatanyabikorwa bacu bagize uruhare mu kuboneka kw’izi nkingo. Twiteguye guhita dutangira gukingira duhereye ku bahawe urukingo rwa mbere rw’AstraZeneca.”
Yakomeje agira ati: “Dukomeje kandi ibiganiro n’abafatanyabikorwa kugira ngo n’izindi nkingo zikenewe ziboneke bityo dukingire umubare munini w’abaturarwanda kuko ari bumwe mu buryo buzatuma dutsinda burundu iki cyorezo”.
Biteganyijwe ko uyu wa Gatanu inkingo zose zakiriwe zirara zigejejwe mu bigo nderabuzima hirya no hino mu gihugu ku buryo gukingira bizatangira ejo ku itariki 29 Gicurasi 2021. Indege za kajugujugu zatangiye kwifashishwa mu kugeza izo nkingo mu bice bitandukanye by’Igihugu.
