Imitwe ya politiki n’iyitwaje intwaro 7 yamaze kwiyunga n’uwa TPLF hamwe na OLA mu rugamba rwo kurwanya ingabo za Leta, zihuje umugambi wo gukura igihugu mu maboko y’ubutegetsi bwa Minisitiri w’Intebe Abiy Ahmed.
Ubufatanye bw’iyi mitwe bwashyizweho umukono kuri uyu wa Gatanu tariki ya 5 Ugushyingo 2021, ihuriro ryayo rikaba ryahawe izina rya United Front of Ethiopian Federalist Forces.
Umuvugizi wa OLA (Oromo Liberation Army) yahamirije ibiro ntaramakuru by’Abanyamerika, Associated Press dukesha iyi nkuru, ko amasezerano yo kurema iri huriro yasinywe ariko avuga ko gukura Abiy Ahmed ku butegetsi bizagirwamo uruhare n’abo bireba bose, barimo n’abagize guverinoma.
Iyi mitwe ihuje imbaraga nyuma y’aho iyi ibiri isanzwe ihanganye n’ingabo za Leta kuva mu Gushyingo 2020 itangarije ko yafashe ibice birimo Dessie na Kombolcha muri Amhara, kandi ifite umugambi wo gufata n’umurwa mukuru w’igihugu, Addis Ababa igakuraho ubutegetsi bwa Abiy.
Gusa ku ruhande rwa Leta, yo irahamagarira igisirikare n’abasivili kwambarira urugamba, bakarwanya iyi mitwe yitwaje intwaro.
Mu itangazo yasohoye, Abiy Ahmed yavuze ko TPLF na OLA imeze nk’imbeba yayobye umwobo, itegereje urupfu mu kwerekana ko gufata ibi bice byo muri Amhara bisa no kuyoba inzira.
Ku ruhande rwa Leta ya Ethiopia kandi, yamaze kuvuga ko izakomeza urugamba rwayo rwo kurwana n’inyeshyamba zo muri Tigray, nubwo mu mahanga hakomeje kwiyongera abasaba ko habaho agahenge.
Itangazo ryo ku mbuga nkoranyambaga rivuga ko Ethiopia irimo kurwana intambara ijyanye no kubaho kwayo nk’igihugu kandi ko itazasenywa n’icengezamatwara (propaganda) ry’amahanga.
Ibihugu byo muri Afurika, umuryango w’Ubumwe bw’Uburayi na Leta Zunze Ubumwe z’Amerika byongeye gusaba ko habaho agahenge, n’ibiganiro byo gusoza iyi ntambara imaze umwaka.
Jeffrey Feltman, intumwa yihariye y’Amerika mu karere k’ihembe ry’Afurika, ari mu ruzinduko mu murwa mukuru Addis Ababa rwo kotsa igitutu cyo gutuma haboneka umuti unyuze mu mahoro.
Leta ya Ethiopia ivuga ko ingabo zayo ziri hafi kugera ku ntsinzi, ariko inyeshyamba za Tigray People’s Liberation Front (TPLF) zikomeje gutera intambwe zisatira umurwa mukuru, ari na ko mu minsi ishize zafashe imijyi imwe ikomeye.
Intambara yatangiye gute?
Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n’umurwa mukuru wayo Mekelle.
Ubu zibumbiye mu mutwe wa Tigray Defence Forces (TDF) uhuriwemo na TPLF n’indi mitwe yitwaje intwaro yaho.
Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n’ingabo za leta ya Ethiopia mu kwezi kwa cumi na kumwe mu 2020.
Abakuru ba TPLF bashwanye na Minisitiri w’intebe wa Ethiopia Abiy Ahmed ku bijyanye n’amavugurura muri politiki, nubwo kuba TPLF yarafashe ibigo bya gisirikare by’ingabo za leta byo muri Tigray ari yo yabaye imbarutso y’igitero leta yayigabyeho ku itariki ya 4 y’ukwa 11 mu 2020.
Leta ya Ethiopia ivuga ko TPLF ari umutwe w’iterabwoba, ariko TPLF yo ivuga ko ari yo leta y’akarere ka Tigray yemewe n’amategeko.
Mushobora kudukurikirana ku mbuga nkoranyambaga zacu, mukazajya mugezwaho amakuru agezweho ako kanya.
Kanda hano udukurikirane (Follow) kuri Facebook Page yacu.
https://youtu.be/JQKoyC3ZVBo
https://youtu.be/tLZPcuI2yaE
https://youtu.be/wB8OZhhjjiE
https://youtu.be/VFx7RbXdB8E
https://youtu.be/Z_kyu7POWBM
https://youtu.be/XBfVYIw3c6k
Niba hari inkuru mufite mushaka gusangiza abakurikira uyu rubuga, mwatwandikira kuri info@amazuku.com
