Umunyamakuru wa ISIBO TV, Uwamwezi Mugire uzwi nka Bianca, ubwo yitabiraga ibirori yateguye yise “Bianca Fashion Hub” yaserutse yambaye ikanzu itukura yamutwaye asaga ibihumbi 500Frw.
Ikanzu Bianca yari yambaye yari yayirengejeho ikote rirerire rigera hasi ku birenge, Ingofero yari yambaye yakozwe na Tanga Design, mu gihe Amaherena yari yambaye yayaguze ibihumbi 15 Frw.
Uyu mukobwa ‘Red Carpet’ yayinyuzeho nk’umwamikazi, aberewe bigaragara.
Yari yambaye ikanzu ngufi itukura ifite ikote rirere rirenzeho. Uwo mwambaro wakozwe na Isha Collection, asobanura ko wamutwaye ibihumbi 500 Frw.
Ku mutwe yari yambaye ingofero yakozwe na Tanga Design ku bihumbi 50 Frw mu gihe inkweto ndende za High Hills yari yambaye zo yaziguze ibihumbi 60 Frw.
Amaherena maremare yari yambaye yasobanuye ko yayaguze ibihumbi 15 Frw mu gihe makeup yakorewe na “Nadia Makeup” yazishyuye ibihumbi 30 Frw, bivuze ko uko yagaragaraga inyuma byari bifite agaciro k’ibihumbi 635 Frw.
Bimwe mu byatumye atekereza gutegura ibirori by’imideli ni uko abantu bakunze kumubwira ko yambara akaberwa, bituma yifuza gutegura igikorwa cyahuriza hamwe abantu bambaye neza.
Bianca Fashion Hub yabaye ku wa Gatandatu tariki ya 23 Ukwakira 2021 kuri ONOMO Hotel.
Kabano Franco umaze kwamamara mu mideli mu Rwanda, yabaye umugabo wahize abandi kwambara neza mu bitabiriye ibi birori.
Mu bari n’abategarugori ho hatsinze Iradukanda Odylle usanzwe afite inzu y’imideli ya ODILEIRA DESIGN ikora imyambaro itandukanye.
Byari ibirori byitabiriwe n’abantu b’ingeri zitandukanye biganjemo ibyamamare bizwi mu Rwanda. Buri wese waserutse wabonaga yakoze iyo bwabaga ngo ahatambukane umucyo.
Abitabiriye bacaga kuri ‘Red carpet’ bakiyereka akanama nkemurampaka kari kagizwe na Muhire Patrick, washinze inzu y’imideli yitwa Inkanda House ndetse na Gatarayiha Angelique ufite inzu y’imideli ya Isha Collection.
Kuri ‘Red carpet’ haciyeho abantu basaga 50 bambaye imyambaro itandukanye haba abayikoreye ndetse n’abayikorewe n’abanyamideli bo mu Rwanda. Mu baserutse kimwe cya kabiri cyari cyambaye ‘Made in Rwanda’.
Nyuma yo kwiyereka akanama nkemurampaka, habayeho gutoranya abagabo batandatu batambutse barimbye kurusha abandi ndetse n’abari n’abategarugori barushije abandi.
Nyuma yo gutoranya aba nibwo bahisemo babiri bahize abandi, mu bagabo hatoranywa Kabano Franco waserutse yambaye ikote n’ipantalo bya Fendi byadozwe n’ Inkanda House.
Mu bagore hatowe Iradukunda Odylle wari wambaye ikanzu yitiriye Bianca Fashion Hub yakorewe mu nzu ye y’imideli.
Aba batsinze banejejwe no kuba bahawe ibihembo kuko byabafashe igihe cyo gihitamo imyambaro bazaserukana none ubu babashije kwegukana igihembo.
Iradukunda Odile yagize ati: “Gutsinda bisobanuye ikintu kinini kuri njye, naje nta bitekereza ariko byabaye. Biranshimishije cyane kuko ubu bigiye gutuma nagura ibikorwa byanjye”.
Mu gufitamo abatsinze akana nkemura mpaka kagendeye ku bintu bitandukanye birimo ubwoko bw’umwenda uwaserutse yambaye n’uburyo ukozwemo ndetse n’uko uwambaye yigaragaje.
Muhire Patrick wari mu kanama nkemurampaka, yavuze ko mu gutoranya barebye abambaye imyambaro myiza igaragara neza ndetse n’ibyo bayijyanishije n’uko bitwaye kuri ‘Red carpet’.
Ku ruhande rwa Bianca wari wateguye ibi birori yavuze ko yishimye kubona abantu baje ari benshi kandi barimbye byatumye agira imbaraga zo kuzakomeza gutegura ibi birori.
Yagize ati: “Ndumva nishimye, ndumva ibintu nabonye byandenze ndashima Imana n’undi muntu wese witabiriye Bianca Fashion Hub”.
Abatsinze bahawe ibihembo birimo itike y’indege yo gutembere muri Nairobi cyangwa Mombasa, bahabwa icupa rya Champagne ya Moët ndetse bazahabwa imyenda na Inkanda House.
Mushobora kudukurikirana ku mbuga nkoranyambaga zacu, mukazajya mugezwaho amakuru agezweho ako kanya.
Kanda hano udukurikirane (Follow) kuri Facebook Page yacu.
https://youtu.be/XBfVYIw3c6k
https://youtu.be/Z_kyu7POWBM
